Сапраўднае імя Валярыны Куставай – Валерыя Кустава. Яна нарадзілася 9 кастрычніка 1984 у Менску.  

Навучалася ў ДМШ №9 (1991–1995), скончыла ДМШ №19 (1998) па клясе скрыпкі, другі інструмэнт фартэпіяна. Навучалася ў ліцэі з тэатральным ухілам №136 (1991–1995); пасьля – у беларускамоўнай клясе школы №211 (1995–2002).  

Наведвала Беларускі Калегіюм – аддзяленьне «філязофія/літаратура» (2003), скончыла Польскі Інстытут у Менску (2003), БДУ культуры і мастацтваў (2007, дыплём з адзнакай, спэцыяльнасьць «Літаратурная работа», спэцыялізацыя – Кінадраматургія), магістратуру Беларускай дзяржаўнай акадэміі мастацтваў (2008, спэцыяльнасьць «Мастацтвазнаўства», спэцыялізацыя – «Кінатэлемастацтва») – абаранілася на ступень магістра мастацтвазнаўства.  

Працавала рэдактарам выдавецтва «Мастацкая літаратура» (2008–2009).  

Ад 2008 году – асьпірант Беларускай дзяржаўнай акадэміі мастацтваў. Сябра Саюзу Беларускіх Пісьменьнікаў (2004), Беларускага ПЭН-цэнтру (2009).

Першая нізка вершаў з прадмовай Алеся Разанава выйшла ў 7 гадоў у часопісе «Бярозка» (№9–10, 1992).

Першы зборнік паэзіі «Кроў Сусьвету», 1996, з прадмовай Васіля Жуковіча быў надрукаваны, калі аўтарцы яшчэ ня споўнілася 12 гадоў. Сэкцыю паэзіі СБП прайшла ў 16 гадоў.

Другі зборнік паэзіі «Каб неба сагрэць…» выйшаў у 2004, у 19 гадоў, з прадмовай Рыгора Барадуліна.

Трэйці зборнік паэзіі «Тамсама» выйшаў у 2006, у 21 год.

Валярына Кустава – аўтар шэрагу песень, якія выконвае пад гітару. Некаторыя–песьні напісаныя ў суаўтарстве зь беларускімі кампазытарамі і выконваюцца беларускімі ансамблямі і сьпевакамі; асобныя творы перакладзеныя на нямецкую, францускую, швэдзкую, ангельскую, літоўскую, грузінскую, украінскую, польскую і расейскую мовы. Сама перакладае зь беларускай, расейскай, украінскай, польскай і некаторых іншых моваў.

Дыплямант ІІ форума творчай моладзі «ХХІ стагодзьдзе – музыка надзеі» (1997), ляўрэат Міжнароднага конкурсу вершаваных твораў (2000), які праводзіўся пад эгідай ЮНЭСКА ў Парыжы.

Мае шматлікія публікацыі у пэрыёдыцы: «Полымя», «Дзеяслоў» «Маладосьць», «ЛіМ» «Культура», «Бярозка», «Беларусь», «Новы час», «Наша Ніва», «Зьвязда» і іншыя;

Удзельнічае ў міжнародных літаратурных пленэрах і фэстах: «Mińsk-Mixt» (2008, Варшава, Польшча), «Парадак слоў» (2007, 2008 Менск, Беларусь), «Дні беларускай культуры ў Нямеччыне» (2009, Бэрлін, Нямеччына), «Біларуська весна» (2009, Кіеў, Украіна), «Міжнародны літаратурна-мастацкі пленэр» (2009, Паланга, Літва), "IV Міжнародная выстава-кірмаш" (2009, Ашхабад, Туркменістан) і іншыя.

Сольныя паэтычныя выступы за мяжой: Варшава (2009, Варшаўскі ўнівэрсытэт, арт-кавярня "Mesita"), Бэрлін (2009, арт-клюб АKUD і Дом авангарднага мастацтва «Tacheles»), Дрэздэн (2009,«Alte Feuerwache Loschwitz») і інш.

Вядзе блог http://valjaryna.livejournal.com/