Чыстым інеем пакрыты

На гасьцінцы беразняк,

Космы густа ім абвіты;

Ў белым сьнезе маладняк.

Сьвішчуць сані на марозе,

Коні рвуцца і хрыпяць.

Крык і гоман на дарозе,

Бомы стогнуць і зьвіняць.

Ськверыць холад. Пабялелі

Вусы, сьвітка вазака,

Толькі шчокі счырванелі

Ад марозу ў мужыка.

Перад сьвятам заработкі,

А дарога, як сьляза...

Толькі бухаюць калодкі,

Толькі сьвіст ад палаза!..