Вецер-смык на струнах-тросах  

Грае дзікія факстроты  

Як дазоры‚ альбатросы‚  

Нібы здані‚ шчоглы-гроты.  

Акіяну й неба шэрасьць‚  

Маракі наўкол паселі.  

Дзень і ноч калоціць‚ мэрам  

На шалёнай карузэлі.  

Раптам кіне‚ нібы з кручы‚  

Скрыгане‚ як сталь у жорнах.  

Як у пекле тым кіпучым‚  

Круціць‚ верціць‚ бела‚ чорна...  

Паўтарацьмеш бязупынна‚  

Як вар'ят той загайданы -  

Ўсе пяскі зьбяру з пустыняў  

І засыплю акіяны...