Гэй ты, маці, родна мова,  

Гэй ты, звон вялікі, слова,  

               Звон магучы,  

               Звон бліскучы,  

               З срэбра літы,  

               З злота зьбіты,  

               Загрымі ты,  

                     Загрымі!  

Гэй, званар, званар, мой пане,  

Бій у звон, як змогі стане,  

               Без спачынку,  

               Безупынку,  

               Потам зьліты,  

               Ім умыты, –  

               Бій, звані ты,  

                     Бій, звані!  

Гэй, гусьляр, пясьняр, мой браце,  

Грай, сьпявай у полі, ў хаце,  

               Дзе гарота,  

               Дзе галота,  

               Дзе нясыты,  

               Дзе няўмыты.  

               Ім спыні ты,  

                     Жаль спыні!  

Струны хай грымяць і рвуцца,  

З болю, з гневу. Хай сьмяюцца  

               Разам зь імі,  

               Не чужымі,  

               Голас чысты,  

               Залацісты,  

               Зь імі зьлій ты,  

                     Зь імі зьлій!..