...Брат, забывай, што малады

Па бальшаку скакаў найпершы.

Твае крылатыя сьляды

Затопчуць пешыя.

На сьвяце ліпеня шыкуй –

Ды чуй ад студзеня,

Здалёку:

Дарога не па бальшаку.

Дарога збоку.

Яна вядзе цябе за край

Звычайных зьмен сьвятла і цемры.

Ты вобмацкам яе шукай, –

Дарогу веры.

Ня гніся – лінію дабра

Направа выгнуць ці налева,

Нібы з Адамава рабра

Выточваць пацеркі для Евы.

I выняньчаць цябе

Рака,

Ігліца,

Дзьмухавец і рута,

Калі ты пылам бальшака

Дыхнуў атрутна.