Зноў залечвае груша

Лёсу голае гольле:

Так натруджаны грузчык

Рукі ў кіпені гоіць.

Учарнелай чарэшні

Незайздросная доля:

Ці арол, а ці рэшка,

Як марозік да долу?

I на споведзь да яблынь

Не сьпяшаюцца пчолы,

Бо зялёнае слаба

Разьлілося па чорным.

Нечакана распаліць

Пнём альховым дзядзінец,

I рукою бяспалай

Вербы сонца падымуць.

Ліст упаў на галіну,

Ухапіўся аберуч,

Як за полымя гліна

Ці радок за паперу.

На гняздоўі пакоўным

Трубіць бусел пра стрэчу.

Паміраць ад спакою,

Уваскрэснуць ад стрэсу.