Чалавек, які падтрымлівае агмень,

Чалавек, які беражэ каханьне,

Чалавек, які моліцца хлебу,

Прыйдзе да мяне,

Прыгнечанага каменным горадам,

Разьбітага няўдачамі і паўсядзённай мітусьнёй,

Раздражнёнага бюракратамі і крывадушнікамі.

Я не буду дамагацца тваёй дабрадзейнасьці,

Я не буду дапытвацца,

Як падтрымліваюць агмень,

Берагуць каханьне,

Моляцца хлебу.

Проста пасядзі са мной,

Мне будзе дастаткова тваёй маўклівай прысутнасьці,

I калі ты пакінеш мой дом –

Ты не пакінеш мяне.