Шукаю радасьці ў журбе,

Шукаю вартасьці ў Айчыне,

Шукаю сьмеласьці ў сабе,

Шукаю сьветласьці ў жанчыне.

Шукаю праўды, як вар’ят

У дзежцы зь дзёгцем – лыжку мёду.

Нібы ў граху – цнатлівасьць, я

Шукаю сонца ў люстры лёду.

Чытаю зорныя сьляды –

Шукаю тлумачэньняў болю.

Гады гудуць, як правады,

А я шукаю ветра ў полі.

Шукаю рэха – у гарах,

Шукаю бляску іскры ў кожным,

Шукаю вечнасьці ў вачах...

І надараецца – знаходжу.