У мяне памёр стол.

Ад самоты, бо доўгі час

За яго не сядаў ніхто з нас.

Мы яго пафарбавалі,

Прыклеілі ножку.

Але атрымалася мумія,

А стол не ўваскрос.

Ці ёсьць іншы сьвет

Зь іншым жыцьцём

Для нежывых істотаў?

Мы пахавалі стол на сьметніку,

Стаялі і выціралі вочы насоўкамі,

А насы рукавамі.

Ці ёсьць іншы сьвет

Зь іншым жыцьцём

Для нежывых істотаў?

Калі ёсьць,

Няхай ён там будзе шчасьлівы.