Всяко писание Богом водъхненое полезно ест ко учению и ко обличению, исправлению и ко наказанию правды. «Да совершен будеть человек Божий и на всяко дело добро уготован», – яко святы и апостол Павел пишеть. И сего ради светые писма уставлена суть к нашему навчению, исправлению, духовному и телесному, различными обычаи: едины законом Ветхым и Новым, другые светыми пророки даны суть нам, иные деянием светых отець, а некые притчами премудрых учителей, некоторые теже песнями и псалмы, от царя Давыда и от иных Божиих певцев сложеными, яко ест Псальтырь.

Тые же вси первоменованые писма, кажное с них токмо едину речь в собе замыкаеть; яко закон живота вечного людей доступити учить; пророци приидущее доброе добрым, а злое злым проповедують; деяния же и животы светых отець жити нас на свете в боязни Божией и в терпении навчають; притчи пак и приповести премудрых учителев добрых обычаев младых и старых наставляють.

Псалтырь же сама едина вси тые речи в собе замыкаеть и всех тых учить и все проповедуеть, – суть бе в ней псалмы, яко бы сокровище всих драгых скарбов, всякий немощи духовный и телесный уздравляють, душу и смыслы освещають, гнев и ярость усмиряють, мир и покой чинять, смуток и печаль отгоняют, чювствие в молитвах дають, людей в приязнь зводять, ласку и милость укрепляють, бесы изгоняють, ангелы на помощь призывають.

Псалом ест щит против бесовскым нощным мечтанием и страхом, покой денным суетам и роботам, защититель младых и радость, старым потеха и песня, женам набожная молитва и покраса, детем малым початок всякое доброе наукы, дорослым помножение в науце, мужем моцное утверьжение.

Псалом ест всея церькви единый глас, свята украшаеть. Псалом всякую противность, еже ест Бога ради, усмиряеть. Псалом жестокое сердце мякчить и слезы с него, яко бы со источника, изводить. Псалом ест ангельская песнь, духовный темъян, вкупе тело пением веселить, а душу учить.

И что ест, чего в псалмох не найдешь? Нест ли там величества Божия и хвалы Его?

Там ест справедливость. Там ест чистота душевная и телесная. Там ест наука всякое правды. Там мудрость и разум досконалый. Там ест милость и друголюбство без льсти; и вси иншии добрые нравы, яко бы со источника, оттоле походять. Там ест великая тайна о Бозе в Троици Едином и о воплощении Господа нашего Исуса Христа, и о вмученьи Его невинном, и о воскресении из мертвых. Там ест надежа востания из мертвых и вечного живота, боязнь страшного суду и вечьного огня. Там ест многых скрытых тайн зъявление. Вси тыи речи, яко бы у великом сокровищи, в сей малой Псалтыри найдешь.

И видечи таковые пожиткы в так малой книзе, я, Францишек, Скоринин сын с Полоцька, в лекарскых науках доктор, повелел есми Псалтырю тиснути рускыми словами, а словенскым языком напред ко чти и к похвале Богу в Троици Единому и пречистой Его матери Марии, и всем небесным чином, и святым Божьим, а потом к пожитку посполитого доброго, наболей с тое причины, иже мя милостивый Бог с того языка на свет пустил.

А зовется псалтырь гудба, едина подобна к гуслям. Яко сам царь и пророк поет, глаголя: «Хвалите Господа во псалтыри и в гуслех». И сего для поставил ест царь Давыд четырех великих ереов, их же избрал от всех людей, Азафа и Емана, и Ефана, и Идифума, абы гудли на псалтыри пред киотом завета Господьня и псалмы абы припевали по вся часы, яко пишеть о том в первых книгах Паралипоменона.

Ест же той роздел Псалтыри от гуслей. Гусле имеють много струн, псалтырь же толико имать десеть струн, яко пишеть о том: «Хвалите Господа во псалтыри десятострунней».

А была сия гудьба уставлена духом святым на знамя десятерого Божьего приказанья, еже дал Господь Моисеови на горе Синай, а то к нашему научению, абы мы, Псалтырю поючи, чтучи и говорячи, всегда имели десятеро Божье приказание пред очима.

Также будь ведомо, положил есми некоторые на стороницах в сей Псалтыри главы з розных книг, а то для того, абы знакомито было, иже вси иные светые писма згожаються съ Псалтырею и одно на другое светчить. А то, чтучи в тых книгах, иже суть главы на боцех пописаны, знайдете. Также положил есми на боцех некоторый слова для людей простых, не рушаючи самое Псалтыри ни в чем же, яко суть онагри, и Геродеево жилище, и хлябие, и иные слова, который суть въ Псалтыри неразумный простым людем, найдуть е на боцех руским языком, что которое слова знаменуеть. Теже розделил есми вси псалмы на стихи по тому, яко ся в ыных языцех делить.

А так ест конець предъсловия Псалтыри.