Міфічныя насельніцы Чорнага возера, што знаходзіцца ў лесе,  недалёка ад вёскі Брусы Мядзельскага раёна. Уяўляліся ў выглядзе маладых жанчын  з доўгімі зеленаватымі валасамі, цёмнай скураю і ступнямі ў выглядзе плаўнікоў. На дотык вельмі халодныя  і замест крыві ў іх нібыта вада. Апранутыя ў сукні, сплеценыя з багавіньня. Выходзячы на бераг, размаўляюць на незразумелай, як быццам птушынай, мове і сьпяваюць падобна да салоўкаў. Глыбока пад вадою іх сьпеў нагадвае жабінае крактаньне. Чалавек, які ўбачыць азярніцаў, не павінен выдаць сябе, каб не быць зацягнутым імі ў багну. Гэта пагражае і тым, хто купаецца ў возеры. Азярніцы сваіх ахвяраў не адпускаюць. Відавочна, азярніцы з'яўляюцца мясцовай мадыфікацыяй русалак. Гл. таксама Начніца.